Yangi hujjatlar

ЎзБлоггерлар чемпионати (таклиф)

Twitter ижтимоий тармоғида бир “ярамас” одатим бор (чунки бу одатим “timeline шайдолари”га ёқмайди). Яъни маълум бир кунда маълум бир мавзу танлаб, Twitterда ўшани муҳокама қилишни сўрайман. Шундан кейин бошланади, биров у деган, биров бу деган, хуллас тимелине “қайнайди”. Шу кунгача #uzbmusic, #uzbkino, #Hojiboy, #uzbcity, #uzbook, #uz2012, #twiparodiyaва шунга ўхшаш мавзуларда қизғин суҳбат қурдик.

Бугун “Фуқаролик жамияти” журналининг навбатдаги сонини ўқий туриб, унда ёритилган асосий мавзуни Twitterга ҳам кўчиришга аҳд қилдим – #uzbOAV.

Мавзуни муҳокама қила туриб, бир лойиҳа миямга келиб қолди. Юртимизда интернет ривожланиб бормоқда ҳамда ўзбек фойдаланувчилари орасида блог юритадиганлар сони кундан-кунга ортмоқда. Бу борада Муҳрим ўз блогида мақола ёзган ва ЎзБлоггерларнинг кичик сарҳисобини қилган эди.

Тўлдириш:
Ўзбекча блогларнинг каталоги билан қуйидаги иккита лойиҳа орқали ҳам танишишингиз ҳам мумкин:

Ўзбек блоггерлари рўйхати – http://uzbloggerlar.blogspot.com/

Ўзбекча блоглар – http://uzblogs.shermuhammad.com/

Блоглар сони кўп, аммо унда ёзилаётган фикрлар кам. Блоггерларга узвийлик етишмайди, стабиллик йўқ. Масалан, мен ҳам ушбу блогни очганимда, дастлаб жавлон уриб фаолият олиб боришга ҳаракат қилдим, лекин кейинчалик азалий одатим – дангасалигим тутиб қолди. Ҳозир блогимда фикрлар кам, деярли йўқ.

Вой, чалғиб кетибман, хуллас, лойиҳа ҳақида. Лойиҳанинг асосий мазмуни шундан иборатки, ЎзБлоггерлар орасида танлов/чемпионат/лига ўтказсак. Бундан кўзланган асосий мақсад, Блоггерлар фаоллигини ошириш, ўзаро фикр алмашиш, мавзуни муҳокама қилиш, уни ўзига хос услубда ёритиш, эркин фикр билдириш кўникмасини ошириш, Блоггерлар орасида соғлом рақобат муҳитини яратиш ва яна шунга ўхшаган олди-қочди мақсадлар 🙂

Энди конкрет таклиф, механизм ҳақида қисқача (бу менинг таклифим холос):

1. Танловни узвийликда олиб бориш мақсадида бир марталик танлов эмас, узоқроқ давом этадиган чепионат/лига шаклида ташкил қилиш керак.

2. Чемпионат/лига қуйидаги кўринишда ўтади:
a) Дастлаб, танловда қатнашиш хоҳишини билдирган блоггерлар рўйҳатдан ўтказилади ва умумий турнир жадвали таркибига киритилади.
b) Чемпионат/лига маълум бир турдан иборат бўлади (5, 7, 10, 15, 20)
c) Ҳар бир тур маълум бир даврга (ҳафта/10 кун/ой) тўғри келади.
d) Ҳар турда барча учун ягона мавзу танлаб олинади.
e) Блоггерлар ушбу мавзу бўйича ўз блогларида блогпост ёзади. Блогпост исталган жанрда, исталган услубда (масалан, фақат расмли), исталган ҳажмда ёзилиши мумкин.
f) Блогпостда танқид, таҳлил, таклиф кабилардан ўрин ажратилиши мақсадга ўта мувофиқ!
g) Турлар тугагандан сўнг, ушбу мавзуга даҳлдор барча мақолалар интернетда овозга қўйилади ва умумий рейтинг шакллантирилади (шу жойда қанақа балл беришни ўйлаб кўриш керак).
h) Барча турлар якунлангандан сўнг ғолиблар рейтинг жадвали бўйича аниқланади.

Овозга қандай қўйилади?

1. Имкони борича ушбу чемпионат/лига интернет ОАВларида, ижтимоий тармоқларда кенг ёритиб борилишини таъминлаш керак. Бунда бизга Kun.uz, Muloqot.uz, Gazeta.uz, Olam.uz, Uff.uz, Stadion.uz каби оммабоп сайтлар ёрдам берса яхши бўлар эди.
2. Шунингдек, Facebook, Twitter каби ижтимоий тармоқларда барчамиз тарғиб қилишимиз керак (балким алоҳида гуруҳлар очилар).
3. Овозга қўйиш ҳам балким айнан ўша ижтимоий тармоқларда олиб борилар. Facebook’да – like, Twitter’да – RТ ҳисобига.

Ҳозирча шулар, бу ўта хомаки вариант. Калламга келганини таҳрирламасдан Wordга туширдим. Албатта бу лойиҳани такомиллаштириш борасида сизнинг таклиф ва мулоҳазаларингиз зарур бўлади. Балки, бу ҳақида Блогингизда пост қолдирарсиз 🙂 1-турга тайёргарлик сифатида!

Фикрларингизни кутаман.

P/S: Лойиҳани ёзаётган вақтимда яна бир фикр келиб қолди, яъни қатнашмоқчи бўлган блоггерларни рўйҳатини йиғиб, қуръа ташлаб, pley-off шаклида ҳам ўтказса бўлади. Масалан, Темур Аъзамга қарши Муҳрим! 2 та мақола, 2 та иштирокчи. Овозга қўямиз – битта ғолиб!

Мазкур мақола Сизга манзур бўлдими?
  • Ҳа (4)
  • Йўқ (0)
  • Бироз (0)

15 фикр

  1. Yaxshi g'oya, men Xudo xohlasa qatnashaman. Lekin, menda bitta taklif bor. Bunda, hamma uchun bir xil mavzu bo'lmasligi kerak, chunki hamma bloggerlar ham o'sha mavzuda yoza olmasligi mumkinku.

    Shuning uchun, buni kubok tarzida o'tkazsakchi, har turda qanchadir ishtirokchi chiqib ketadi. Har bir tur uchun mavzu tanlanmaydi, hamma xohlagan mavzusida yozadi.

  2. Mavzu jaaa unaqa murakkab yoki tor doirada bo'lmaydi. Masalan, mavzu "O'zbekistondagi uyali aloqalar" mavzusi deylik. Sizning mutaxassisligingiz iqtisodchi, men huquqshunos. Siz iqtisodiy tomonlarini yoritasiz, men yuridik tomonlarini. Kimdir texnik tomonlarini. Shunaqaroq. Ya'ni tanganing bir nechta tomonini ko'rib chiqishga harakat qilamiz. Bu mening fikrim xolos.

    Qolganlar fikrini ham kutaylikchi…

  3. Таклиф яхши, ҳаттоки зўр. Бу мусобақадан мақсад кимнидир ғолиб чиқиши эмас, балки блоггингни кучайтириш. Буни ҳаммамиз билиб турибмиз.

    Менимча, плей-офф босқичи унчалик тўғри эмас. Мавзу ҳақидаги таклифингизни қабул қиламан (ўзим қабул қиламан, бошқалар фикрини ҳам кутайлик). Ўша лига кўриниши маъқул. Фейсбукдаги "лафк", Твиттердаги "РТ"лардан ташқари, ҳакамлар ҳайъати ҳам бўлса. Уларнинг фикрини ҳам эшитиш керак.

    Сайтларда фақат энг зўр деб топилганлари эълон қилинади. Охирида ўзимиз йиғилиб банкет ташкил қилиб, уни ҳам ёритамиз.

    Буни узвийлигини таъминлаш керак.

  4. Xushnudbek, g‘oya twitterda aytganimdek yaxshi. Yuqoridagi sharxga yozgan javobingizni o‘qib yana bir savol tug‘ildi. Agar liga tashkil qilinsa, u ochiq ya‘ni, barcha o‘zbek bloggerlari uchun bo‘ladimi yoki faqat o‘zbekistonliklar uchunmi? Bu savolni berganimning boisi, agar ochil liga bo‘lsa O‘zbekistondan tashqarida yashovchilar ba'zi mavzularda umuman boshqa fikrda bo‘lishi, yoki Siz bergan mavzuda umuman ma'lumotga ega bo‘lmasligi mumkin. Misol uchun, o‘sha siz aytgan "O‘zbekistondagi uyali aloqalar" mavzusi ham. Rossiya, AQSh yoki qirg‘izistonlik nari borsa qanaqa kompaniyalar borligini bilishi mumkin. Shu tarafini ham bir o‘ylab ko‘rsangiz maqsadga muvofiq bo‘lur edi.

  5. Siz yurtimizdan tashqaridagi UzBloggerlar haqida aytayapsizmi yoki xorijlik fuqarolar haqidami?

    Qaysi mavzuni tanlashni albatta muhokama qilamiz, imkon qadar hamma uchun umumiy, qulay mavzu tanlaymiz. Misol uchun, "O'zbekistonda uyali aloqalar" emas, balki "Uyali aloqalarning jamiyatdagi o'rni" (qayerdaligini farqi yo'q). Bu misollar xolos. Hali kelishamiz yana.

  6. Savolingizga savol bilan javob beraman. UzBlogger deganda blogger O‘zbekiston fuqarolarini tushunish kerakmi yoki o‘zbek tilida blog yurituvchi odamlarnimi (fuqaroligidan qat'iy nazar)? Chunki O‘zbekiston tashqarida yashovchi o‘zbeklar soni bir necha million, faqat Qirg‘izistonning o‘zida yarim milliondan ortiq o‘zbek yashaydi. Ular orasida ham o‘zbek tilida blog yozuvchilar bo‘lishi mumkin. Misol uchun men. 🙂

  7. Blogi yo'qlar qatnashsa bo'lmaydimi?

  8. Blog ochvorasiz, tamom 🙂 Agar blogi yo'qlar ham qatnashsa, unda oddiy jurnalistik tanlovdan farqi qolmaydi.

  9. Qanaqadir belgilangan mavzu tanlanishi judayam g'alati. Manimcha oy yoki har o'n kunlikda eng yaxshisini tanlansa yaxshi bo'larmidi?!

  10. Bardak bo'lmasmikin deymanda. Mavzu deganda jaaa tor mavzuni o'ylamang, keeeng bo'ladi. Mavzu emas, soha yoki yo'nalish desak to'g'riroq bo'lar edi.

  11. Uzr, kun davomida bu haqda yozishga imkon bo'lmadi.

    Rus bloggerlari estafeta o'ynashardi. Balki hali ham o'ynashar. Masalan, kimdir bir mavzuni boshlaydi, aytaylik, oddiygina: "Men yaxshi ko'rgan 5ta film", deganga o'xshash. O'sha 5ta filmga bitta postda kichkina-kichkina taqrizchalar, umuman nega shu filmlarni yaxshi ko'rishni yozadi-da, "Endi estafetani Pistonchi'ga beramiz, ko'ramiz, u qanday filmlarni ma'qul ko'rarkin", deb postni tugatadi.

    Pistonchi o'z blogining boshida: "Falonchi sevimli kinolar haqida estafeta boshladi va navbatni menga berdi…", deb ulab ketaveradi. Hamma galma-galdan yozib chiqadi shunda.

    Bu tajribadan o'tgan misol, xohlasanglar, shunday qilsa ham bo'ladi, demoqchiman.

  12. Loyihadan ko'zlangan maqsad – o'zbek tilidagi bloggingni kuchaytirish. Ularning qayerda istiqomat qilishi, menimcha, muhim emas.

    Lekin, ba'zi nyuanslar bor, albatta. Masalan, SherAbdugapirov'ning blogi WordPress.com hostingida; unga esa O'zbekistondan har doim ham to'g'ridan-to'g'ri kirib bo'lmaydi. Yoki, LiveJournal'dagi bloglarga kirish ham oxirgi vaqtlar juda og'irlashib, qiyinlashib ketgan.

    Nima bo'lganda ham, o'zbek tilida yoziladigan barcha bloglar bu loyihada ishtirok etaverishlari kerak. Menimcha.

  13. Ha, bu muammo haqida xabar topdim. Shu sabab blogspotdagi blogim yana jonlandi. Ya'ni, postlar har ikki blogda paralel ravishda beriladi. Kimga qaysi qulay bo‘lsa, o‘shandan o‘qiydi.

  14. Mani fikrimcha musobaqada har kim o`zi xohlagan, qiziqqan, qo`lidan kegan narsani yozishi kerak. A g`olibni hakamlar hay`ati yoki o`quvchilarni ovoz berishi, xech bo`maganda kommentariylaga qarab aniqlash kerak.

  15. Hammaga bir hil mavzu berilsa manimcha tori boladi. Shundagina bloggerni qirralari ochiladi turli hil mavzularda fikrini yoritishga. Qo’llab quvvatlimiz. Omad

Фикр билдиринг

yoki
Saytga kirganingizdan so‘ng fikr bildirish imkoniyatiga ega bo‘lasiz
Юқорига